Andijon viloyatida 23,4 mingdan ortiq faol tadbirkorlik subyekti mavjud. Sanoat yo‘nalishidagi kichik tadbirkorlik subyektlari soni 5 mingdan oshadi, hunarmandlar soni esa 2193 nafarga yetgan. Ishlab chiqarish sohasida tadbirkorlar ulushi yildan yilga oshib bormoqda. Bu ko‘rsatkichlar hududda o‘z mahsulotini kengroq bozorlarga olib chiqishdan manfaatdor ishlab chiqaruvchilar va hunarmandlar soni sezilarli ekanini ko‘rsatadi.

Joriy yilning 15 oktabr kuni Andijon shahrida Biznes va tadbirkorlik oliy maktabi, Andijon viloyati hokimligi hamda “Wildberries” xalqaro elektron tijorat platformasi hamkorligida “O‘zbekistonda elektron tijorat orqali kichik va o‘rta biznesni qo‘llab-quvvatlash imkoniyatlari” mavzusida amaliy seminar o‘tkazildi. Tadbirda 130 nafardan ortiq tadbirkor va hunarmand, tadbirkorlik bilan shug‘ullanayotgan xotin-qizlar va yoshlar, shuningdek, davlat tashkilotlari vakillari ishtirok etdilar.

Tadbir davomida “Wildberries” mutaxassislari platformaning afzalliklari va imkoniyatlari haqida taqdimot o‘tkazdilar. Kichik ishlab chiqaruvchi uchun elektron savdo platformasi tayyor savdo infratuzilmasi vazifasini bajaradi. Tadbirkor ombor, yetkazib berish va to‘lovlarni qabul qilish tizimini o‘zi yaratmasdan, platforma tomonidan taqdim etiladigan xizmatlardan foydalanadi. Bu, ayniqsa, o‘z savdo tarmog‘iga ega bo‘lmagan hunarmandlar va kichik korxonalar uchun muhimdir. 

Ushbu biznes model ishlab chiqaruvchi daromadiga ham ta’sir qiladi. Mahsulot hududdan tashqaridagi xaridorlarga qayta sotuvchilar ishtirokisiz yetkazilganda, qo‘shilgan qiymatning katta qismi ishlab chiqaruvchining o‘zida qoladi. Elektron savdo hajmining o‘sishi esa viloyatda logistika va saqlash xizmatlariga bo‘lgan talabni ham oshiradi.

Biznes va tadbirkorlik oliy maktabi tomonidan hududlarda o‘tkazilayotgan bunday seminarlardan asosiy maqsad tadbirkorlarning raqamli ko‘nikmalarini oshirish va ularni elektron tijorat vositalaridan samarali foydalanishga o‘rgatishdan iborat.

Seminar yakunida tadbirkorlar bilan keyingi bosqichda ishlash bo‘yicha kelishuvga erishildi. Unga ko‘ra, elektron savdoga chiqishga tayyor subyektlar saralab olinadi, ularning mahsulotlari o‘rganiladi va marketpleyslarda savdoni boshlashda amaliy ko‘mak ko‘rsatiladi.