Bugungi kunda milliy iqtisodiyot uchun sanoat korxonalarida ishlab chiqarish samaradorligini oshirish, mehnat unumdorligining yuqori ko‘rsatkichlariga erishish hamda ishlab chiqarish jarayonlariga sifat tizimlarini joriy etishga e’tibor qaratish dolzarb masalalardan sanaladi.

Iqtisodiyot tarmoqlarida ishlab chiqarish samaradorligini oshirish maqsadida 2026-yil 12-oktabr kuni Farg‘ona viloyati hokimligi huzuridagi Sanoat zonalarini boshqarish direksiyasi hamda Biznes va tadbirkorlik oliy maktabining Farg‘ona filiali hamkorligida «Tejamkor boshqaruv tizimi» bo‘yicha amaliy o‘quv seminari boshlandi.

12–16-oktabr kunlari davom etadigan seminarda viloyatdagi 30 ta korxona va tadbirkorlik subyekti vakillari ishtirok etmoqda. Mashg‘ulotlar germaniyalik tajribali biznes-maslahatchi, tejamkor ishlab chiqarish bo‘yicha yetakchi ekspert doktor Feliks Fremeray ishtirokida olib borilmoqda.

Mazkur seminar sanoat korxonalarida tejamkor ishlab chiqarishni joriy etish, shuningdek, ushbu yo‘nalishda mutaxassislarning bilim va amaliy ko‘nikmalarini oshirishga qaratilgan. Seminar doirasida aynan Farg‘ona viloyatidagi sanoat korxonalarida ishlab chiqarish jarayonlarining iqtisodiy samaradorligini oshirish, ishchi va xodimlarning yuqori mehnat unumdorligini ta’minlash hamda sifat tizimlarini takomillashtirishga qaratilgan mahsulot ishlab chiqarish masalalariga alohida e’tibor qaratiladi.

Amaliy mashg‘ulotlarda ishtirokchilar 5S, Kayzen, PDCA, Kanban va qiymat oqimini xaritalash kabi zamonaviy boshqaruv usullarini o‘rganib, ularni korxonalarda qo‘llash bo‘yicha amaliy ko‘nikmalarga ega bo‘ladilar. Shuningdek, seminar ishtirokchilari ishlab chiqarish jarayonlaridagi yo‘qotishlarni aniqlash, ortiqcha xarajatlarni kamaytirish va resurslardan samarali foydalanish masalalariga alohida e’tibor qaratadilar.

Seminar doirasida Farg‘ona kichik sanoat zonasida joylashgan avtomobillar uchun aksessuarlar va plastmassa mahsulotlari ishlab chiqaruvchi korxonalar, shuningdek, to‘qimachilik korxonalariga tashriflar tashkil etiladi. Tashriflar davomida ishlab chiqarish jarayonlari bevosita o‘rganilib, ularda tejamkor boshqaruv tizimini joriy etishning amaliy jihatlari ko‘rsatib beriladi.