Marg‘ilon shahrida xalqaro elektron platformalardan faol foydalanish orqali elektron tijoratni rivojlantirish hamda kichik va o‘rta biznes imkoniyatlarini kengaytirishga qaratilgan seminar bo‘lib o‘tdi.

Tadbir Biznes va tadbirkorlik oliy maktabi tomonidan “Wildberries” xalqaro platformasi va Marg‘ilon shahar hokimligi bilan hamkorlikda tashkil etildi.

Seminarning asosiy maqsadi mahalliy ishlab chiqaruvchilar va hunarmandlarga raqamli savdo kanallarini o‘zlashtirish hamda elektron tijoratni eksport vositasiga aylantirishda ko‘maklashishdan iborat bo‘ldi.

Seminarda Marg‘ilon shahar hokimining birinchi o‘rinbosari kirish so‘zi bilan ishtirok etdi.

Tadbirda, shuningdek, Oliy biznes maktabi mutaxassislari va “Wildberries” kompaniyasi vakillari ham ishtirok etdilar.

Ishtirokchilar orasida 50 nafar tadbirkor, jumladan, hunarmandlar, kichik va o‘rta biznes egalari, savdo kompaniyalari hamda ishlab chiqaruvchilar bor edi.

Ishtirokchilarning asosiy e’tibori mahalliy ishlab chiqaruvchining o‘z mahsuloti bilan mintaqadan tashqariga va xorijiy mamlakatlarga qanday chiqishi mumkinligi haqidagi amaliy masalaga qaratildi.

Ekspertlarning ta’kidlashicha, boy hunarmandchilik an’analari va rivojlangan to‘qimachilik sanoatiga ega Marg‘ilon shahri uchun raqamli platformalar vositachilarni chetlab o‘tib, logistika to‘siqlarining bir qismini bartaraf etgan holda xorijdagi xaridorga to‘g‘ridan-to‘g‘ri yo‘l ochadi.

O‘zbekistonlik tadbirkorlarning platformadagi natijalari bu imkoniyatlarning yaqqol isboti bo‘ldi. 2025-yil yakunlariga ko‘ra, O‘zbekistondan sotilgan mahsulotlar hajmi 186,3 mlrd so‘mga yetdi, sotuvchilar soni 109 foizga, taqdim etilgan mahsulotlar assortimenti esa 186 foizga oshdi.

Go‘zallik mahsulotlari, kitoblar, to‘qimachilik, uy-ro‘zg‘or buyumlari va maishiy texnika eksportbop mahsulotlarga ekanligi ko’rsatib o‘tildi. Aynan shu sohalarda Marg‘ilon ishlab chiqaruvchilari katta va hali to‘liq ishga solinmagan salohiyatga ega.

Seminarning amaliy qismi ochiq tarzida davom ettirildi. Tadbirkorlar “Wildberries” mutaxassislari bilan birgalikda elektron do‘konni ro‘yxatdan o‘tkazish va yuritishning amaliy bosqichlarini o‘rgandilar.

Tadbir so‘ngida ishtirokchilar Marg‘ilon shahridagi hunarmandchilik ustaxonalari va ishlab chiqarish korxonalarida bo‘lib, mahalliy mahsulotlarning xalqaro savdo platformalariga chiqishga tayyorligini bevosita joyida baholash imkoniga ega bo‘ldilar.