O‘zbekiston Respublikasi Prezidentining 2024-yil 25-iyundagi PQ–234-son “Mahallalarni obodonlashtirish, ko‘kalamzorlashtirish va qiyofasini tubdan yaxshilashga doir qo‘shimcha chora-tadbirlar to‘g‘risida”gi qarori ijrosini ta’minlash maqsadida O‘zbekiston Mahallalari uyushmasi huzuridagi Servis oliy maktabi tomonidan mahalla servis kompaniyalari rahbarlari, uyushmaning tuman (shahar) bo‘limlari bosh hisobchilari hamda obodonlashtirish yo‘nalishi uchun mas’ul xodimlar ishtirokida qisqa muddatli intensiv malaka oshirish o‘quv kurslari tashkil etildi.

O‘quv mashg‘ulotlari joriy yilning 15–28-iyul kunlari Biznes va tadbirkorlik oliy maktabi professor-o‘qituvchilari ishtirokida o‘tkazilmoqda. Ular dasturning asosiy yo‘nalishlari bo‘yicha ma’ruza va amaliy mashg‘ulotlarni olib borishmoqda.

Mashg‘ulotlar davomida tinglovchilar mahalla servis kompaniyalari faoliyatini samarali tashkil etishning zamonaviy yondashuvlari, strategik boshqaruv, moliyaviy intizom, soliq qonunchiligi, soliq imtiyozlaridan foydalanish, davlat xaridlarida ishtirok etish, raqamli texnologiyalar hamda elektron hujjat aylanishi masalalari bo‘yicha bilim va ko‘nikmalarini oshirmoqda. Shuningdek, aholiga xizmat ko‘rsatish tizimini takomillashtirish, fuqarolar murojaatlari bilan ishlash, xizmatlar sifatini ta’minlash va amaliy boshqaruv ko‘nikmalarini rivojlantirish masalalariga alohida e’tibor qaratilmoqda.

Biznes va tadbirkorlik oliy maktabi professor-o‘qituvchilarining mazkur malaka oshirish kurslaridagi ishtiroki mahalla servis kompaniyalari rahbar va mutaxassislarining kasbiy salohiyatini oshirish, zamonaviy boshqaruv usullarini amaliyotga joriy etish hamda davlat islohotlarini samarali amalga oshirishga xizmat qilmoqda.