Respublikada tadbirkorlik tashabbuslarini qo‘llab-quvvatlash, kichik biznesni rivojlantirish va aholi bandligini ta’minlash bo‘yicha izchil chora-tadbirlar amalga oshirilmoqda. Ayollar tadbirkorligini rivojlantirish hamda amaliy bilim va ko‘nikmalarni egallash imkoniyatlarini kengaytirishga alohida e’tibor qaratilmoqda.

Biznes va tadbirkorlik oliy maktabining Xorazm viloyat hududiy filiali tomonidan «Marketing xizmatlari va tovar hamda xizmatlar reklamasini tashkil etish» hamda «Tadbirkorlik asoslari» yo‘nalishlarida qisqa muddatli o‘quv kurslari tashkil etildi. Kurs bitiruvchilari o‘zlashtirgan bilim va ko‘nikmalarini amaliyotda samarali qo‘llab kelishmoqda.

Jumladan, yakka tartibdagi tadbirkor va hunarmand M. Iskandarova «Marketing xizmatlari va tovar hamda xizmatlar reklamasini tashkil etish» kursini tamomlagach, 5,7 mln so‘m miqdorida imtiyozli kredit hamda qiymati 5 mln so‘mlik tikuv mashinasini xarid qilish uchun subsidiya bilan ta’minlandi.

Shu kurs bo‘yicha Koshko‘pir tumanidan tadbirkor Sh. Qodirova ham ta’lim oldi. Bugungi kunda ular milliy va zamonaviy kiyimlar tikish bilan shug‘ullanib, yuqori sifat va o‘ziga xos dizaynga ega mahsulotlar ishlab chiqarmoqda. Shuningdek, «ustoz–shogird» an’anasi doirasida ayollar va yoshlar tikuvchilikka o‘qitilib, kasbiy rivojlanish va bandlik imkoniyatlariga ega bo‘lishmoqda.

Gurlan tumanida tadbirkor Sh. Tojibayeva «Tadbirkorlik asoslari» kursini tamomlab, don va don mahsulotlari ishlab chiqarishni yo‘lga qo‘ydi. «Oilaviy tadbirkorlik» dasturi doirasida unga 33 mln so‘mdan ikki marotaba imtiyozli kredit ajratildi, bu esa ishlab chiqarishni kengaytirish va yangi ish o‘rinlarini tashkil etish imkonini berdi.

Qisqa muddatli o‘quv kurslari tadbirkorlik ko‘nikmalarini rivojlantirish, biznesni yo‘lga qo‘yish va kengaytirish, yangi ish o‘rinlarini yaratish hamda hududlarning ijtimoiy-iqtisodiy rivojlanishiga xizmat qilmoqda.