Biznes va tadbirkorlik oliy maktabining Andijon viloyati hududiy filiali aholini tadbirkorlik faoliyatini rivojlantirishda amaliy qo‘llab-quvvatlash, bandlikni oshirish hamda oilalarning iqtisodiy barqarorligini mustahkamlash borasidagi ishlarini izchil davom ettirmoqda.

Mazkur ishlar doirasida hududiy filial tomonidan tashkil etilgan “Tadbirkorlik va biznes asoslari” o‘quv kursiga “Temir daftar”ga kiritilgan A. Ismonov hamda o‘zini o‘zi band qilgan M. Soliyeva jalb etildi.

O‘quv kursi davomida ishtirokchilar tadbirkorlik faoliyatini tashkil etish, biznes-reja ishlab chiqish, moliyaviy savodxonlik, marketing, iste’molchilar talabini o‘rganish hamda o‘z biznesini samarali boshqarish bo‘yicha nazariy va amaliy bilimlarga ega bo‘ldilar. Shuningdek, tadbirkorlik g‘oyalarini shakllantirish, biznes loyihalarni tayyorlash va davlat tomonidan yaratilgan qo‘llab-quvvatlash mexanizmlaridan foydalanish masalalariga alohida e’tibor qaratildi.

Filial mutaxassislari tomonidan ishtirokchilarga biznes-rejalarni ishlab chiqish, loyihalarning iqtisodiy samaradorligini baholash, shuningdek, imtiyozli kreditlar, ssudalar va subsidiyalar olish tartibi yuzasidan keng qamrovli maslahat va amaliy yordam ko‘rsatildi.

Ko‘rsatilgan ko‘mak natijasida A. Ismonov o‘z xonadonida issiqxona tashkil etdi. Loyihaning amalga oshirilishi natijasida 4 ta yangi oilaviy ish o‘rni yaratildi. Bu esa aholi bandligini ta’minlash, oila daromadlarini oshirish hamda hududda qishloq xo‘jaligi ishlab chiqarishini rivojlantirishga xizmat qilmoqda.

Shuningdek, M. Soliyeva o‘z xonadonida tikuvchilik faoliyatini yo‘lga qo‘ydi. “Ustoz-shogird” yo‘nalishi doirasida 3 ta yangi ish o‘rni yaratildi. Mazkur faoliyat xotin-qizlar va yoshlarning bandligini ta’minlash, hunarmandchilikni rivojlantirish hamda bozorda talab yuqori bo‘lgan tikuvchilik mahsulotlari ishlab chiqarish hajmini kengaytirishga xizmat qilmoqda.

Amalga oshirilgan loyihalar aholining tadbirkorlik tashabbuslarini qo‘llab-quvvatlash bo‘yicha olib borilayotgan ishlarning samaradorligini yaqqol namoyon etmoqda. Olingan bilimlar, maslahatlar va amaliy ko‘mak natijasida fuqarolar barqaror daromad manbalarini yaratib, oila a’zolari bandligini ta’minlash hamda hududlarning ijtimoiy-iqtisodiy rivojlanishiga munosib hissa qo‘shishga erishdilar.

Biznes va tadbirkorlik oliy maktabining Andijon mintaqaviy filiali bundan buyon ham aholi tadbirkorlik tashabbuslarini qo‘llab-quvvatlash, yangi ish o‘rinlari yaratish va kichik biznesni rivojlantirish borasidagi faoliyatini davom ettiradi.