Buxoro viloyati o‘zining boy tarixiy merosi, betakror me’moriy obidalari va milliy qadriyatlari bilan dunyo sayyohlarini o‘ziga jalb etib kelmoqda. Bugungi kunda turizm sohasini rivojlantirish hudud iqtisodiyotini yuksaltirish, yangi ish o‘rinlari yaratish hamda xalqaro hamkorlikni kengaytirishda muhim omil bo‘lib xizmat qilmoqda.

Shu munosabat bilan Vazirlar Mahkamasi huzuridagi Biznes va tadbirkorlik oliy maktabi Buxoro viloyati hududiy filiali hamda Buxoro turizm va madaniy meros texnikumi hamkorligida “Buxoro viloyatida turizmni rivojlantirish: imkoniyatlar va istiqbollar” mavzusida davra suhbati tashkil etildi.

Tadbirda texnikumning bitiruvchi talabalari, turizm sohasi tadbirkorlari va yetakchi mutaxassislar ishtirok etishdi. Jumladan, Buxoro viloyati Turizm boshqarmasi, IT Park Buxoro filiali, E-auksion platformasi hamda Tadbirkorlikni rivojlantirish kompaniyasi vakillari turizm sohasida zamonaviy yondashuvlar, raqamli texnologiyalar va innovatsion biznes modellarni joriy etish bo‘yicha o‘z fikr va takliflarini bildirdilar.

Davra suhbati davomida turizm infratuzilmasini takomillashtirish, ichki va tashqi turizm salohiyatini oshirish, sayyohlar uchun qulay va zamonaviy xizmatlar yaratish masalalari muhokama qilindi. Ayniqsa, raqamlashtirish jarayonlari, onlayn xizmatlarni kengaytirish va elektron platformalardan samarali foydalanish mavzulari ishtirokchilarda katta qiziqish uyg‘otdi.

Tadbir doirasida “Al Voris” turistik firmasi asoschisi Behzod Usmonov tomonidan master-klass tashkil etildi. Unda turizm bozorida muvaffaqiyatga erishish yo‘llari, mijozlarga sifatli xizmat ko‘rsatish, innovatsion yondashuvlar va zamonaviy marketing usullari haqida amaliy tavsiyalar berildi. Master-klass yoshlar uchun katta motivatsiya va tajriba maktabi bo‘ldi.

Davra suhbati turizm sohasida bilim va tajriba almashish, yangi tashabbuslarni qo‘llab-quvvatlash hamda yosh mutaxassislarning kasbiy salohiyatini oshirishga xizmat qildi. Bunday tadbirlar Buxoro viloyatida turizmni yanada rivojlantirish, uning xalqaro nufuzini mustahkamlash va hududning iqtisodiy salohiyatini yuksaltirishda muhim ahamiyat kasb etadi.