O‘zbekiston Respublikasi Prezidentining 2025-yil 14-martdagi 103-sonli “Oila va xotin-qizlarni qo‘llab-quvvatlash tizimini yanada takomillashtirish chora-tadbirlari to‘g‘risida”gi qaroriga muvofiq, mamlakatimizda xotin-qizlarning hayot sifatini oshirish va imkoniyatlarini kengaytirishga qaratilgan kompleks dastur izchil amalga oshirilmoqda.

Mazkur hujjatga ko‘ra, har yili “Ayollar daftari”ga kiritilgan va ijtimoiy qo‘llab-quvvatlashga muhtoj 50 ming nafar xotin-qizlar Toshkent viloyatidagi dam olish maskanlariga yuborilishi belgilangan. Dastur doirasida ular uchun psixologik yordam ko‘rsatish hamda tadbirkorlik ko‘nikmalarini rivojlantirishga qaratilgan motivatsion seminarlar tashkil etilmoqda.

Navbatdagi bosqich Bo‘stonliq tumanida joylashgan “Livinston” dam olish maskanida bo‘lib o‘tmoqda. Bu yerda ishtirokchilar boy va mazmunli sog‘lomlashtirish hamda ta’lim dasturida qatnashishmoqda. Tadbirlar shaxsiy rivojlanish, o‘ziga bo‘lgan ishonchni mustahkamlash va barqaror hayotiy strategiyalarni shakllantirish masalalariga bag‘ishlangan.

Dastur amalga oshirilishida Biznes va tadbirkorlik oliy maktabi vakillari muhim o‘rin tutmoqda. Ular tomonidan o‘tkazilayotgan amaliy mashg‘ulotlar davomida ishtirokchilar tadbirkorlik faoliyatini yuritish, moliyaviy savodxonlik, shuningdek, o‘z biznesini rejalashtirish va yo‘lga qo‘yish bo‘yicha zarur bilim va ko‘nikmalarga ega bo‘lmoqda.

Shu bilan birga, psixologik treninglar ham tashkil etilib, ular orqali xotin-qizlarning ichki salohiyatini ochish, emotsional barqarorligini mustahkamlash va ijobiy fikrlashni shakllantirishga alohida e’tibor qaratilmoqda. Bunday yondashuv ishtirokchilarga nafaqat zarur yordam ko‘rsatish, balki ularning kelgusida o‘zini ro‘yobga chiqarishi va iqtisodiy mustaqilligini ta’minlash uchun mustahkam zamin yaratadi.

Tashkilotchilar ishtirokchilarning yuqori faolligini alohida ta’kidlab, bunday tashabbuslar jamiyatda ayollarning o‘rnini mustahkamlash, tadbirkorlikni rivojlantirish hamda hududlarda ijtimoiy farovonlikni oshirishga xizmat qilishini qayd etmoqda.

Dastur davom etmoqda va u davlat tuzilmalari, ta’lim muassasalari hamda mutaxassislar hamkorligida xotin-qizlarni qo‘llab-quvvatlash borasida barqaror natijalarga erishishga qaratilgan.