Biznes va tadbirkorlik oliy maktabi mutaxassislari O‘zbekiston tekstil sanoati uchun yangi eksport bozorlarini aniqladi - global iqtisodiy noaniqliklar va savdo zanjirlaridagi o‘zgarishlar sharoitida eksport geografiyasini diversifikatsiya qilish O‘zbekiston uchun strategik ahamiyat kasb etmoqda.

O‘tkazilgan tadqiqot natijalariga ko‘ra, O‘zbekistonning tekstil sanoati uchun 13 ta mahsulot guruhi bo‘yicha 20 dan ortiq yangi potensial eksport bozorlari aniqlandi.

Aniqlangan bozorlar quyidagi davlatlarni o‘z ichiga oladi: Hindiston, Xitoy, Italiya, Yaponiya, Malayziya, Pokiston, Filippin, Saudiya Arabistoni, Buyuk Britaniya va boshqa istiqbolli yo‘nalishlar. Ushbu mamlakatlarda import talabi yuqori, bozor konsentratsiyasi nisbatan past, shuningdek, logistika va savdo sharoitlari maqbul hisoblanadi. Ushbu omillar O‘zbekiston eksportchilari uchun yangi kirish imkoniyatlarini yaratadi.

Tahlil shuni ko‘rsatadiki, ko‘plab bozorlarda O‘zbekistonning hozirgi ulushi past bo‘lib, bu foydalanilmagan eksport salohiyati mavjudligini anglatadi.

Hududlar kesimida esa Namangan, Farg‘ona, Andijon, Samarqand va Sirdaryo viloyatlari bir qator tekstil mahsulotlari bo‘yicha yuqori eksport salohiyatiga ega hududlar sifatida ajralib chiqdi.

Tadqiqot maxsus ishlab chiqilgan Yangi Bozor Indeksi (NMI) asosida amalga oshirilgan bo‘lib, quyidagi omillar kompleks baholandi: import talabi va o‘sishi, savdo mosligi (TCI), raqobat darajasi, logistika xarajatlari, bozor “white space” darajasi va xalqaro xaridor signallari.

Tahlil 95 mingdan ortiq buyer signal va 500 mingga yaqin savdo kuzatuvlariga asoslangan bo‘lib, natijalar real eksport qarorlarini qabul qilish uchun amaliy ahamiyatga ega.

Umuman olganda, tadqiqot natijalari O‘zbekiston tekstil sanoati uchun eksport geografiyasini kengaytirish, yuqori qo‘shilgan qiymatli segmentlarga chiqish va global qiymat zanjirlaridagi ishtirokni kuchaytirish bo‘yicha muhim imkoniyatlar mavjudligini ko‘rsatadi.