O‘zbekiston Respublikasi Konstitutsiyasi qabul qilinganligining 33 yilligi hamda 9 dekabr – Xalqaro korrupsiyaga qarshi kurashish kuni munosabati bilan O‘zbekiston Respublikasi Vazirlar Mahkamasi huzuridagi Biznes va tadbirkorlik oliy maktabi professor-o‘qituvchilari, xodimlari va magistratura tinglovchilarining huquqiy savodxonligini oshirish, targ‘ibot-profilaktika ishlarini takomillashtirish hamda korrupsiyaga qarshi kurashish sohasida ilmiy-nazariy bilim va amaliy ko‘nikmalarini mustahkamlash maqsadida Ichki ishlar vazirligi akademiyasi professori, polkovnik – Qobilov Sharif Rahimovich ishtirokida ma’naviy-ma’rifiy tadbir tashkil etildi.

Tadbirni, O‘zbekiston Respublikasi Vazirlar Mahkamasi huzuridagi Biznes va tadbirkorlik oliy maktabi direktorining o‘rinbosari Bahrom Avazbaevich Xolboev kirish so‘zi bilan ochib, O‘zbekiston Respublikasi Prezidentining 2025 yil 21 noyabr kuni “O‘zbekiston Respublikasi Konstitutsiyasi kuni bayramiga tayyorgarlik ko‘rish va uni o‘tkazish to‘g‘risida”gi F-60-son Farmoyishiga muvofiq, “Konstitutsiya — inson qadri, erkinlik, tenglik va adolat garovi!” degan hayotiy shior asosida keng nishonlanayotganligini ta’kidladi.

Konstitutsiyamiz — bu xalqimizning erkinligi, huquqlari va manfaatlarini kafolatlovchi muqaddas hujjatdir. U O‘zbekistonning demokratik taraqqiyoti, ijtimoiy-iqtisodiy yuksalishi va xalqimizning farovonligini ta’minlashga xizmat qilayotganini alohida qayd etib o‘tdi.

Tadbir doirasida Ichki ishlar vazirligi akademiyasi professori, polkovnik – Qobilov Sharif Rahimovich tomonidan Konstitutsiyamizning mazmun–mohiyati va ta’lim tizimida korrupsiyaga qarshi odob-axloq qoidalarining mohiyati va ahamiyati, manfaatlar to‘qnashuvining asosiy tushunchalari yoritib berildi.

Shuningdek, korrupsiyaga qarshi kurashish uchun insonda immunitet shakllangan bo‘lishi, immunitet esa “halollik vaksinasi” bilan yuzaga kelishi, “halollik vaksinasi” inson qalbiga igna bilan emas, iymon nuri orqali o‘tib, uning vijdonini poklaydi. Har qanday insonga qondan va ona suti orqali “halollik vaksinasi” singib boradi. Har bir odam o‘z ishini halol bajarsa, u tabiiy ravishda “halollik vaksinasi” bilan emlangan bo‘ladi. Ana shunday immunitetni shakllantirish vazifasi, so‘zsiz, ota-onalar, ta’lim muassasalari xodimlari, shuningdek, xalqimizning ziyoli, ma’naviyatli qatlamiga yuklanganligini ta’kidlab o‘tdi.

Shundan so‘ng, O‘zbekiston Respublikasi Vazirlar Mahkamasi huzuridagi Biznes va tadbirkorlik oliy maktabi Komplaens bo‘lim boshlig‘i v.b. – Ismatov Olimjon Aminjonovich tomonidan Biznes va tadbirkorlik oliy maktabida korrupsiyaga qarshi kurashish bo‘yicha olib borilayotgan choralar hamda davlat xizmatida halollik asoslarini mustahkamlash bo‘yicha ishtirokchilarga taklif va tavsiyalar bildirildi.

Tadbir yakunida professor-o‘qituvchilar, xodimlar va tinglovchilar ma’ruzachilar bilan munozara va fikr almashishib, o‘zlarini qiziqtirgan masalalar bo‘yicha savollarga ma’ruzachilardan javob oldilar.