Navoiy viloyatida tadbirkorlikni rivojlantirish, innovatsion g‘oyalarni qo‘llab-quvvatlash hamda moliyaviy imkoniyatlarhaqida aholining xabardorligini oshirish maqsadida seminar tashkil etildi. 

Mazkur tadbir Biznes va tadbirkorlik oliy maktabi Navoiy viloyat hududiy filiali hamda “Tadbirkorlikni rivojlantirish kompaniyasi” AJ hududiy filiali  hamkorligida tashkil etildi.

Seminarda ishtirokchilarga zamonaviy biznes g‘oyalarni shakllantirish, innovatsion yondashuvlar asosida tadbirkorlik faoliyatini yo‘lga qo‘yish, biznesni rivojlantirishda mavjud moliyaviy manbalar, imtiyozli kreditlar hamda davlat tomonidan yaratilayotgan imkoniyatlar yuzasidan batafsil ma’lumotlar taqdim etildi.

Tadbir davomida “E-auksion” AJ vakili A. Agzamov, Soliq inspeksiyasi xodimi D. Egamov hamda Navoiy Innovatsiyalar Universiteti prorektori T. Haydarov ishtirok etib, o‘zlarining amaliy tajribalari bilan o‘rtoqlashdilar. Ular biznes-reja tuzishning muhim jihatlari, muvaffaqiyatli tadbirkorlik faoliyatini yuritish usullari hamda yangi loyihalarni amalga oshirishda innovatsion yondashuvlarning ahamiyati bo‘yicha tavsiyalar berdilar.

Seminar davomida ishtirokchilar o‘zlarini qiziqtirgan savollarga mutaxassislar tomonidan batafsil javob oldilar.

Tadbir yakunida tadbirkorlikni rivojlantirish, yoshlar va xotin-qizlarning biznes tashabbuslarini qo‘llab-quvvatlash hamda innovatsion g‘oyalarni amaliyotga joriy etish bo‘yicha hamkorlikni yanada kuchaytirish muhimligi alohida ta’kidlandi.