Xotin-qizlarning ijtimoiy va iqtisodiy faolligini oshirish, ularning imkoniyatlarini kengaytirishga qaratilgan davlat dasturi izchil amalga oshirilmoqda. Mazkur tashabbus O‘zbekiston Respublikasi Prezidentining 2025-yil 14-martdagi 103-sonli qaroriga muvofiq, oila va xotin-qizlarni qo‘llab-quvvatlash tizimini yanada takomillashtirish maqsadida yo‘lga qo‘yilgan.

Dastur doirasida “Ayollar daftari”ga kiritilgan va ijtimoiy qo‘llab-quvvatlashga muhtoj xotin-qizlar uchun sog‘lomlashtirish va o‘quv-tarbiyaviy tadbirlar tashkil etilmoqda. Har yili qariyb 50 ming nafar ayol Toshkent viloyatidagi sog‘lomlashtirish maskanlarida tiklanish va ta’lim dasturlarida ishtirok etish imkoniyatiga ega bo‘lishmoqda.

Navbatdagi bosqich Bo‘stonliq tumanida joylashgan “Livinston” dam olish maskanida o‘tkazildi. Unda Namanagan va Sirdaryo viloyatlaridan kelgan xotin-qizlar ishtirok etishdi. Ishtirokchilar uchun sog‘lomlashtirish muolajalari, o‘quv seminarlar va shaxsiy rivojlanishga yo‘naltirilgan treninglarni o‘z ichiga olgan keng qamrovli dastur tayyorlandi.

Tadbir davomida tadbirkorlik ko‘nikmalarini rivojlantirishga alohida e’tibor qaratildi. Biznes va tadbirkorlik oliy maktabi mutaxassislari tomonidan o‘tkazilgan amaliy mashg‘ulotlarda ishtirokchilar biznes yuritish asoslari, moliyaviy savodxonlik hamda o‘z biznes g‘oyalarini ishlab chiqish bo‘yicha bilimlarga ega bo‘lishdi.

Shuningdek, psixologik treninglar ham tashkil etilib, ular orqali ishtirokchilarning o‘ziga bo‘lgan ishonchini mustahkamlash, ichki salohiyatini ochish va ijobiy fikrlashni rivojlantirishga alohida e’tibor qaratildi. Bu yondashuv ularning kelgusida o‘zini ro‘yobga chiqarishi va iqtisodiy mustaqilligini oshirishiga xizmat qiladi.

Tashkilotchilar xotin-qizlarning faol ishtirokini ijobiy baholab, bunday tashabbuslar jamiyatda ularning o‘rnini mustahkamlash, tadbirkorlikni rivojlantirish hamda hududlarda ijtimoiy farovonlikni oshirishga xizmat qilishini ta’kidlashdi.