Joriy yilning 30-aprel kuni Vazirlar Mahkamasi huzuridagi Biznes va tadbirkorlik oliy maktabi vakillari Toshkent davlat texnika universitetida tashkil etilgan “G‘oyadan biznesgacha: yoshlar uchun imkoniyatlar va davlat qo‘llovi” mavzusidagi seminarda ishtirok etishdi. 

Tadbirning asosiy maqsadi yoshlarni tadbirkorlik faoliyatiga keng jalb etish, ularning innovatsion g‘oyalarini qo‘llab-quvvatlash hamda davlat tomonidan yaratilayotgan imkoniyatlar bilan yaqindan tanishtirishdan iborat bo‘ldi.

Seminarni Ilmiy ishlar va innovatsiyalar bo‘yicha prorektor Sardor Donayev olib bordi. Tadbirda universitet talabalari, shuningdek magistratura va doktorantura bosqichida tahsil olayotgan yoshlar faol ishtirok etishdi hamda o‘zlarini qiziqtirgan savollarga mutaxassislardan batafsil javob oldilar.

Tadbirda shuningdek Biznes va tadbirkorlik oliy maktabi Biznes-inkubator va startap-loyihalar bilan ishlash markazi rahbari G‘ofurjon Usmanov ham ishtirok etdi. U o‘z chiqishida yoshlar tomonidan ilgari surilayotgan startap g‘oyalarni qo‘llab-quvvatlash, biznes-inkubatsiya jarayonlari hamda innovatsion loyihalarni amaliyotga tatbiq etish bo‘yicha muhim tavsiyalar berdi.

Tadbir Biznes va tadbirkorlik oliy maktabi hamda Toshkent davlat texnika universiteti Karyera markazi hamkorligida tashkil etildi. Seminar davomida biznesni boshlash, startap loyihalarni rivojlantirish, moliyalashtirish imkoniyatlari, jumladan kreditlar, davlat grantlari va subsidiyalar haqida muhim ma’lumotlar berildi. Shuningdek, IT sohasidagi innovatsion loyihalarni qo‘llab-quvvatlash hamda raqamli platformalar va onlayn-auksionlar orqali yangi bozor imkoniyatlaridan foydalanish yuzasidan ham tushunchalar taqdim etildi.

Yakunda “Muvaffaqiyat tarixi” doirasida amaliyotchi tadbirkor o‘zining shaxsiy tajribasi va biznes yo‘lidagi amaliy saboqlari bilan o‘rtoqlashdi. Tadbir ochiq muloqot ruhida o‘tib, ishtirokchilar uchun foydali fikr almashinuvi va yangi g‘oyalar bilan boyitilgan platformaga aylandi. Bu esa ishtirokchilarning tadbirkorlikka bo‘lgan qiziqishini yanada oshirdi va ularni yangi tashabbuslarga undadi.