Bugungi kunda mamlakatimizda yoshlarni qo‘llab-quvvatlash, ularning innovatsion g‘oyalari va tashabbuslarini ro‘yobga chiqarish davlat siyosatining ustuvor yo‘nalishlaridan biri hisoblanadi. Shu nuqtai nazardan, Biznes va tadbirkorlik oliy maktabi Buxoro viloyat hududiy filiali hamda Vobkent tuman hokimligi hamkorligida yoshlarning startap g‘oyalarini qo‘llab-quvvatlashga bag‘ishlangan davra suhbati tashkil etildi.

Mazkur tadbirda filial mutaxassisi M. Umedova hamda ta’lim sohasida faoliyat yuritayotgan tadbirkor N. Kamolova ishtirok etib, yoshlar bilan ochiq muloqot olib bordilar. Davra suhbati davomida startap loyihalarni shakllantirish, ularni moliyalashtirish manbalari, biznes-reja tuzish hamda innovatsion g‘oyalarni amalga oshirish bosqichlari haqida atroflicha ma’lumotlar berildi.

Tadbir ishtirokchilari o‘zlarining qiziqtirgan savollariga javob olish bilan birga, amaliy tavsiya va maslahatlarga ega bo‘ldilar. Shuningdek, mutaxassislar tomonidan yoshlarga zamonaviy tadbirkorlik muhiti, raqamli iqtisodiyot imkoniyatlari va startap ekotizimi haqida tushunchalar berildi.

Davra suhbati interaktiv ruhda o‘tib, ishtirokchilarning faolligi va qiziqishi yuqori bo‘ldi. Bunday tadbirlar yoshlarning tadbirkorlikka bo‘lgan qiziqishini oshirish, ularni mustaqil fikrlashga va innovatsion g‘oyalar yaratishga undashda muhim ahamiyat kasb etadi.