Biznes va tadbirkorlik oliy maktabi Qoraqalpog‘iston Respublikasi hududiy filiali hamda Wildberries marketpleysi hamkorligida Nukus shahrida tadbirkorlar, hunarmandlar va yoshlar uchun “Elektron tijorat sohasida biznesni boshlash va yuritish. Wildberries platformasida savdoni yo‘lga qo‘yish” va “Marketpleys menejeri” mavzularida amaliy o‘quv kurslari bo‘lib o‘tdi.

Mazkur tashabbus hududda elektron savdoni rivojlantirish va mahalliy mahsulotlarni global bozorga olib chiqishni qo‘llab-quvvatlashga qaratildi.

Mashg‘ulotlar davomida elektron tijoratni boshlash bosqichlari, marketpleyslarda ro‘yxatdan o‘tish, mahsulot joylashtirish, buyurtmalarni boshqarish, logistika va to‘lov jarayonlari yuzasidan batafsil tushuntirishlar berildi.

Hududda o‘tkazilgan amaliy o‘quv kurslarida 400 nafardan oshiq elektron tijoratga qiziquvchi tinglovchilar, mahalliy tadbirkor va hunarmandlar ishtirok etishdi. Tadbir hududlarda elektron tijoratni rivojlantirish, tadbirkorlarning bilim va eksport salohiyatini oshirishga xizmat qilishi bilan ahamiyatli bo‘ldi.