Guliston shahridagi 1-son ixtisoslashtirilgan maktab-internatida 11-sinf bitiruvchilari ishtirokida “Tadbirkorlik asoslari va biznesga ilk qadam” mavzusida davra suhbati bo‘lib o‘tdi.

Mazkur tadbir Biznes va tadbirkorlik oliy maktabi Sirdaryo viloyati hududiy filialining 2026-yil 1-aprelda tasdiqlangan Faoliyatini rivojlantirish bo‘yicha chora-tadbirlar rejasida belgilangan vazifalar ijrosi doirasida tashkil etildi.

Davra suhbatida Biznes va tadbirkorlik oliy maktabi Sirdaryo viloyati hududiy filiali hamda elektron onlayn auksionlarni tashkil etish sohasidagi hamkor tashkilotlar vakillari ishtirok etdi.

Tadbirning asosiy maqsadi yoshlarni tadbirkorlik faoliyatiga qiziqtirish, ularda biznes yuritish bo‘yicha dastlabki bilim va ko‘nikmalarni shakllantirish, shuningdek, elektron savdo platformalari va onlayn auksionlarning imkoniyatlari haqida tushuncha berishdan iborat bo‘ldi.

Uchrashuv davomida bitiruvchilarga tadbirkorlik va biznes asoslari, biznes faoliyatini boshlashning dastlabki qadamlari, zamonaviy biznes muhitida faoliyat yuritish, elektron savdo platformalaridan samarali foydalanish hamda onlayn auksionlarda ishtirok etish tartiblari yuzasidan ma’lumotlar berildi.

Shuningdek, tadbirkorlik g‘oyasini shakllantirish, uni amaliyotga tatbiq etish, bozor talablarini o‘rganish, zamonaviy raqamli vositalardan foydalanish va biznes jarayonlarini samarali tashkil etishning muhim jihatlari tushuntirildi.

Tadbir interaktiv muloqot va savol-javoblar shaklida o‘tkazildi. Bitiruvchilar o‘zlarini qiziqtirgan savollar bilan murojaat qilib, soha mutaxassislaridan tegishli javob va tavsiyalar oldilar. Shuningdek, yoshlar tadbirkorlik faoliyati va elektron savdo imkoniyatlari yuzasidan o‘z fikr-mulohazalarini bildirdilar.

Bunday uchrashuvlar yoshlarning tadbirkorlik sohasidagi bilimlarini kengaytirish, ularda tashabbuskorlik va biznes fikrlash ko‘nikmalarini rivojlantirish, zamonaviy iqtisodiy jarayonlar haqida amaliy tasavvur hosil qilish hamda kelgusida mustaqil faoliyat boshlashlari uchun zarur bilimlarni shakllantirishga xizmat qiladi.

Yoshlarni tadbirkorlikka yo‘naltirish, ularning biznes g‘oyalarini qo‘llab-quvvatlash va zamonaviy biznes muhitiga tayyorlash - yangi tashabbuslar va istiqbolli loyihalarni ro‘yobga chiqarish uchun muhim omildir.