Bo‘stonliq tumanidagi «Lingviston» mehmonxonasida Toshkent shahri va Andijon viloyatidan kelgan 300 nafar xotin-qizlar ishtirokida Biznes va tadbirkorlik oliy maktabi tomonidan «Tadbirkorlik ko‘nikmalarini shakllantirish» mavzusida davra suhbati tashkil etildi. Tadbirdan ko‘zlangan asosiy maqsad xotin-qizlarning tadbirkorlik sohasidagi bilim va amaliy ko‘nikmalarini oshirish, ularni biznes tashabbuslarini amalga oshirishga rag‘batlantirish hamda iqtisodiy faolligini qo‘llab-quvvatlashdan iborat bo‘ldi.

Davra suhbati davomida ishtirokchilarga tadbirkorlik faoliyatini boshlashning asosiy bosqichlari, biznes g‘oyani shakllantirish va uni amalga oshirish, bozor talabini o‘rganish, biznes-reja ishlab chiqish, moliyaviy rejalashtirish hamda o‘zini o‘zi band qilish imkoniyatlari bo‘yicha amaliy ma’lumotlar berildi. Ayniqsa, ishtirokchilarning aksariyati «Ayollar daftari» ro‘yxatiga kiritilgan xotin-qizlar ekani inobatga olinib, ular uchun mavjud imkoniyatlardan samarali foydalanish va barqaror daromad manbaini shakllantirish masalalariga alohida e’tibor qaratildi.

Tadbir ochiq muloqot va o‘zaro fikr almashish shaklida o‘tkazilib, xotin-qizlar o‘zlarini qiziqtirgan savollar bilan mutaxassislarga murojaat qilish, tadbirkorlik faoliyatini yo‘lga qo‘yish bo‘yicha zarur amaliy tavsiya va tushuntirishlarni olish imkoniyatiga ega bo‘ldilar. Shuningdek, Biznes va tadbirkorlik oliy maktabining tadbirkorlik sohasida bilim va ko‘nikmalarni rivojlantirish, aholining iqtisodiy faolligini oshirish hamda zamonaviy biznes yuritish ko‘nikmalarini shakllantirishga qaratilgan faoliyati haqida ham ma’lumot berildi.

Mazkur tadbir xotin-qizlarni tadbirkorlikka keng jalb etish, ularning iqtisodiy mustaqilligini mustahkamlash, bandligini ta’minlash va yangi daromad manbalarini yaratishga qaratilgan amaliy tashabbuslarni qo‘llab-quvvatlashda muhim ahamiyat kasb etdi. Biznes va tadbirkorlik oliy maktabi tomonidan tashkil etilayotgan bunday o‘quv va muloqotlar xotin-qizlarning tadbirkorlik salohiyatini rivojlantirish, ularni yangi biznes g‘oyalarini amalga oshirishga yo‘naltirish hamda iqtisodiy faolligini yanada oshirishga xizmat qiladi.