2026-yil 25–26-sentabr kunlari Samarqand agroinnovatsiyalar va tadqiqotlar universitetida «Iqtisodiy o‘sish va inson kapitalini rivojlantirish uchun ta’limning innovatsion shakllari» mavzusida xalqaro forum bo‘lib o‘tdi. Forum Yevropa Ittifoqining Erasmus+ dasturi doirasidagi OFINU loyihasi asosida tashkil etildi. Unda Yevropa Ittifoqi mamlakatlari, O‘zbekiston va Tojikistonning davlat organlari, oliy ta’lim muassasalari hamda biznes vakillari ishtirok etdi.

Forumning yalpi majlisi O‘zbekiston Respublikasi Vazirlar Mahkamasi huzuridagi Biznes va tadbirkorlik oliy maktabining «yashil iqtisodiyot»ni ilgari surish va joriy etish bo‘yicha loyiha ofisi bosh mutaxassisi Anton Kostyuchenkoning ma’ruzasi bilan boshlandi. Ma’ruza «Milliy iqtisodiy maqsadlarga erishishda oliy va uzluksiz ta’limning o‘rni va ta’siri. Markaziy Osiyo tajribasi» mavzusiga bag‘ishlandi.

Ma’ruzachi O‘zbekiston, Tojikiston va Qozog‘istonning butun umr davomida ta’lim olish sohasidagi siyosatini ta’lim ochiqligining sakkizta mezoni asosida tahlil qildi. Ular qatoriga yosh, ta’lim olish imkoniyati, joy va vaqt bo‘yicha ochiqlik hamda malakalarni tan olish kabi mezonlar kiradi.

Alohida e’tibor ushbu mezonlarning beshtasini o‘zida birlashtirgan Biznes va tadbirkorlik oliy maktabi tajribasiga qaratildi. Davlat sektori vakillarining o‘qish davrida ish joyi va o‘rtacha ish haqi saqlab qolinadi. Pre-MBA dasturiga kirish uchun muayyan yo‘nalish bo‘yicha ma’lumot yoki ish staji talab etilmaydi. Hududiy o‘quv kurslaridan boshlab MBA va ikki diplomli dasturlargacha bo‘lgan izchil ta’lim tizimi shakllantirilgan. qasbiy-talim.uz platformasi orqali hududlarda istiqomat qiluvchi qariyb 30 ming nafar fuqaro, jumladan, 9 547 nafar ayol va 7 418 nafar o‘zini o‘zi band qilgan shaxs ta’lim oldi.

«Bu butun umr davomida ta’lim beruvchi universitetning amaliy ifodasidir: katta yoshdagi insonning ta’limga qaytishi uchun barcha bosqichlarni qamrab olgan yaxlit tizim bir joyda jamlangan», - deya ta’kidladi Anton Kostyuchenko.

Ma’ruza yakunida u ochiq ta’lim bo‘yicha milliy konsorsium tashkil etishni taklif qildi. Uning ta’kidlashicha, bunday konsorsium qisqa muddatli kurslar va mikromalakalar natijalarini diplom beruvchi ta’lim dasturlari doirasida tan olish va hisobga olish imkonini yaratadi.