Farg‘ona viloyatining Yozyovon tumanida tadbirkorlik faoliyatini boshlash istagida bo‘lgan xotin-qizlarni qo‘llab-quvvatlash, ularning biznes sohasidagi bilim va amaliy ko‘nikmalarini oshirish maqsadida amaliy uchrashuv tashkil etildi. Biznes va tadbirkorlik oliy maktabining Farg‘ona viloyati hududiy filiali tashabbusi bilan tashkil etilgan mazkur uchrashuvning asosiy maqsadi xotin-qizlarni tadbirkorlikka keng jalb etish, yangi biznes g‘oyalarini shakllantirish hamda ularni amalga oshirishda zarur amaliy ko‘mak va tavsiyalar berishdan iborat bo‘ldi.

Uchrashuv davomida Biznes va tadbirkorlik oliy maktabining Farg‘ona viloyati hududiy filiali mutaxassislari tomonidan tadbirkorlik faoliyatini boshlash va uni samarali yo‘lga qo‘yishning muhim jihatlari bo‘yicha batafsil ma’lumotlar berildi. Xususan, biznes g‘oyasini shakllantirish, bozor talabini o‘rganish, maqsadli auditoriyani aniqlash, raqobat muhitini baholash va puxta biznes-reja ishlab chiqish masalalariga alohida e’tibor qaratildi.

Shuningdek, ishtirokchilarga moliyaviy savodxonlikni oshirish, daromad va xarajatlarni to‘g‘ri rejalashtirish, mablag‘lardan samarali foydalanish, tadbirkorlik faoliyatini qonuniy tartibda tashkil etish hamda mavjud imtiyoz va qo‘llab-quvvatlash imkoniyatlaridan foydalanish bo‘yicha amaliy tavsiyalar berildi.

Amaliy mashg‘ulotlar va ochiq muloqot davomida ishtirokchilar o‘zlarini qiziqtirgan savollarga mutaxassislardan batafsil javob oldilar. Bu esa ularga tadbirkorlik sohasidagi bilimlarini mustahkamlash, biznes yuritishning asosiy tamoyillarini anglash va o‘z g‘oyalarini aniq reja asosida amalga oshirish uchun zarur ko‘nikmalarni shakllantirish imkonini berdi.

Uchrashuvda xotin-qizlarning tadbirkorlikka bo‘lgan qiziqishi va tashabbuskorligi yuqori ekani namoyon bo‘ldi. Ishtirokchilar o‘z biznes g‘oyalarini rivojlantirish, yangi ish o‘rinlari yaratish va daromad manbalarini kengaytirish borasida mutaxassislar bilan fikr almashdilar.

Bunday amaliy uchrashuv va seminarlar xotin-qizlarning iqtisodiy faolligini oshirish, ularni tadbirkorlikka keng jalb etish, yangi biznes tashabbuslarini qo‘llab-quvvatlash hamda hududlarda xotin-qizlar tadbirkorligini rivojlantirishga xizmat qiladi.