Biznes va tadbirkorlik oliy maktabida O‘zbekiston Respublikasi davlat mustaqilligining 35 yilligiga bag‘ishlangan tadbir bo‘lib o‘tdi.

O‘zbekiston Respublikasi davlat mustaqilligining 35 yilligi mamlakatimiz hayotidagi muhim tarixiy voqea sifatida keng nishonlanmoqda. Joriy yilgi bayram tadbirlari “Yagona Vatan, yagona xalq bo‘lib, yangi hayot va kelajak yaratamiz!” ezgu g‘oyasi asosida o‘tkazilmoqda.

Shu munosabat bilan O‘zbekiston Respublikasi Vazirlar Mahkamasi huzuridagi Biznes va tadbirkorlik oliy maktabida ham mamlakatimiz mustaqilligining 35 yilligiga bag‘ishlangan ma’naviy-ma’rifiy tadbir tashkil etildi.

Tadbir davomida Oliy biznes maktabi rahbariyati so‘zga chiqib, yurtimiz mustaqilligining tarixiy ahamiyati, o‘tgan 35 yil davomida mamlakatimiz bosib o‘tgan taraqqiyot yo‘li, iqtisodiy va ijtimoiy sohalarda amalga oshirilayotgan keng ko‘lamli islohotlar haqida fikr bildirdilar.

Ta’kidlanganidek, mustaqillik O‘zbekiston uchun nafaqat davlatchilik va milliy o‘zlikni anglash timsoli, balki xalqimizning o‘z kelajagini mustaqil belgilashi hamda mamlakatimizning ulkan salohiyatini ro‘yobga chiqarishi uchun mustahkam poydevor bo‘ldi. Bugungi kunda Yangi O‘zbekiston taraqqiyotining muhim omillari sifatida inson kapitalini rivojlantirish, zamonaviy bilim va boshqaruv ko‘nikmalarini shakllantirish, tadbirkorlik muhitini yaxshilash hamda iqtisodiy faollikni qo‘llab-quvvatlashga alohida e’tibor qaratilmoqda.

Bu jarayonlarda Biznes va tadbirkorlik oliy maktabi ham munosib o‘rin egallab kelmoqda. Oliy biznes maktabi korporativ va loyiha boshqaruvi, biznes va tadbirkorlik yo‘nalishlari uchun zamonaviy bilim va ko‘nikmalarga ega yuqori malakali kadrlarni tayyorlash, rahbar va mutaxassislarning kasbiy salohiyatini oshirish, shuningdek, tadbirkorlik muhitini rivojlantirishga xizmat qiluvchi ta’lim hamda ilmiy-amaliy loyihalarni amalga oshirishga alohida e’tibor qaratmoqda.

Tadbir davomida professor-o‘qituvchilar ham so‘zga chiqib, mustaqillik yillarida ta’lim va ilm-fan sohasida amalga oshirilgan o‘zgarishlar, yoshlar uchun yaratilayotgan keng imkoniyatlar hamda zamonaviy bilimlarga ega, raqobatbardosh mutaxassislarni tayyorlashda ta’lim muassasalari zimmasidagi mas’uliyat haqida fikr-mulohazalarini bildirdilar.

So‘zga chiqqanlar mamlakatimiz taraqqiyotining bugungi bosqichida har bir fuqaroning, ayniqsa, ta’lim va ilm-fan sohasi vakillarining o‘z kasbiga sadoqat bilan yondashishi, doimo yangilikka intilishi hamda jamiyat rivojiga munosib hissa qo‘shishi muhim ekanini alohida qayd etdilar.

Tadbirda O‘zbekiston Respublikasi davlat mustaqilligining 35 yilligi munosabati bilan ta’sis etilgan “O‘zbekiston Respublikasi mustaqilligining 35 yilligi” esdalik nishonini Oliy biznes maktabi jamoasining bir guruh faol vakillariga tantanali ravishda topshirish marosimi bo‘ldi.

Mazkur tadbirda mustaqillik yillarida bosib o‘tilgan taraqqiyot yo‘li bilan bir qatorda, kelgusidagi ustuvor maqsad va vazifalarga ham alohida e’tibor qaratildi. Xususan, ta’lim sifatini yanada oshirish, xalqaro hamkorlikni kengaytirish, zamonaviy boshqaruv kadrlarini tayyorlash, ilmiy-tadqiqot va innovatsion faoliyatni rivojlantirish, shuningdek, tadbirkorlik va xususiy sektor uchun yuqori malakali mutaxassislar tayyorlash borasidagi ishlar izchil davom ettirilishi ta’kidlandi.

Mustaqillik bayrami bosib o‘tilgan yo‘lni sarhisob qilish va erishilgan yutuqlarni qadrlash bilan birga, kelajak oldidagi mas’uliyatni yana bir bor chuqur his etish fursatidir.

Biznes va tadbirkorlik oliy maktabi jamoasi O‘zbekiston Respublikasi davlat mustaqilligining 35 yilligi munosabati bilan barcha yurtdoshlarimizni samimiy muborakbod etadi.

Xalqimizga tinchlik va xotirjamlik, oilalarga fayzu baraka, yurtimizga taraqqiyot va farovonlik, Yangi O‘zbekistonning ezgu maqsadlarini ro‘yobga chiqarish yo‘lida barcha yurtdoshlarimizga kuch-g‘ayrat va ulkan muvaffaqiyatlar tilaymiz.