Tadbir Oliy biznes maktabi direktorining o‘rinbosarlari Bahrom Avazbayevich Xolbayev hamda Mirkomil Mirаlimovich Adilovning samimiy tabrik so‘zlari bilan boshlandi.

O‘z nutqlarida ular ustoz va murabbiylarning jamiyat taraqqiyoti, yosh avlodning bilim va salohiyatini yuksaltirish, malakali hamda raqobatbardosh kadrlarni tayyorlashdagi beqiyos o‘rnini alohida ta’kidladilar. Shuningdek, mamlakatimizda pedagog xodimlarning mehnatini munosib qadrlash, ularning kasbiy faoliyati uchun zamonaviy va qulay shart-sharoitlar yaratish, ustozlarning jamiyatdagi nufuzi va mavqeini yanada oshirishga qaratilayotgan e’tibor haqida so‘z yuritildi.

Tadbir davomida Oliy biznes maktabi professor-o‘qituvchilarining ta’lim jarayoniga qo‘shayotgan hissasi, tinglovchilarga berayotgan chuqur bilim va amaliy ko‘nikmalari, shuningdek, professional ta’lim tizimini rivojlantirish yo‘lidagi fidokorona mehnati yuksak e’tirof etildi.

Bayram tadbirining eng quvonchli va esda qolarli lahzalaridan biri ta’lim sohasidagi samarali mehnat va ko‘p yillik xizmatlarning munosib taqdirlanishi bo‘ldi. Professor Rasulova Dilfuza Valievna hamda dotsent Xolbayev Bahrom Avazbayevichga “Oliy ta’lim a’lochisi” ko‘krak nishonlari tantanali ravishda topshirildi.

Mazkur e’tirof ularning ta’lim va ilm-fan rivojiga qo‘shgan munosib hissasi, yuqori kasbiy mahorati hamda yosh mutaxassislarni tayyorlash yo‘lidagi samarali faoliyatining yorqin ifodasi bo‘ldi.

Biznes va tadbirkorlik oliy maktabi jamoasi barcha ustoz va murabbiylarni kasb bayrami bilan samimiy muborakbod etib, ularga mustahkam sog‘lik, oilaviy farovonlik, ilmiy va pedagogik faoliyatida yangi muvaffaqiyatlar hamda sharafli kasblarida ulkan zafarlar tilaydi.