Joriy yilning 20-may kuni Biznes va tadbirkorlik oliy maktabida “Ijtimoiy mas’uliyatli marketing” mavzusida mahorat darsi uchrashuvi bo‘lib o‘tdi.

Tadbir professor-o‘qituvchilar, tinglovchilar hamda mehmonlar ishtirokida tashkil etildi. Mahorat darsiga mehmon ma’ruzachi sifatida “ALYANS AUTO” kompaniyasining marketing, savdo va servis bo‘yicha Bosh direktor o‘rinbosari Kadirov Sarvar Sabirovich taklif etildi.

Uchrashuv davomida ishtirokchilarga ijtimoiy mas’uliyatli marketingning zamonaviy yondashuvlari, biznes faoliyatida ijtimoiy mas’uliyatni joriy etish mexanizmlari hamda marketing menejmenti bilan integratsiya qilish masalalari yuzasidan batafsil ma’lumotlar berildi.

Shuningdek, mahorat darsi davomida ijtimoiy mas’uliyatni kompaniya darajasida joriy etish va uni marketing strategiyasi bilan uyg‘unlashtirish, ijtimoiy mas’uliyatli marketingning asosiy tamoyillari hamda strategik yo‘nalishlarini belgilash masalalariga alohida e’tibor qaratildi. Ishtirokchilarga ijtimoiy loyihalar orqali brend imijini mustahkamlash, bozorda raqobat ustunligiga erishish, past daromadli iste’molchilar segmenti bilan ishlashning samarali marketing yondashuvlari hamda ekologik va ijtimoiy barqarorlik tamoyillariga asoslangan uzoq muddatli marketing kampaniyalarini ishlab chiqish bo‘yicha amaliy tavsiyalar berildi.

Tadbir ishtirokchilari mahorat darsi davomida ijtimoiy mas’uliyatli marketingning amaliy jihatlari bilan yaqindan tanishib, real biznes tajribasi asosida o‘z kasbiy bilim va kompetensiyalarini yanada mustahkamlash imkoniyatiga ega bo‘ldilar.