Biznes va tadbirkorlik oliy maktabi Buxoro hududiy filiali tomonidan viloyatdagi ta’lim muassasalari bilan hamkorlikda “Tadbirkorlikka ilk qadam: tajriba va maslahatlar” mavzusida amaliy mahorat darsi tashkil etildi.

Tadbir turizm sohasida o‘z faoliyatini boshlamoqchi bo‘lgan yoshlar, o‘z-o‘zini band qilgan aholi hamda kichik biznes subyektlarini qo‘llab-quvvatlash, ularning biznes ko‘nikmalarini rivojlantirishga qaratildi. Asosiy maqsad Buxoro viloyatining turizm salohiyatidan samarali foydalanish, yoshlarni mazkur sohada bandligini ta’minlash hamda innovatsion biznes tashabbuslarni shakllantirishga ko‘maklashishdan iborat bo‘ldi.

Ma’ruza va amaliy mashg‘ulotlarda Yoshlar ishlari agentligi, AT “Aloqabank”, ATB “Mikrokreditbank” Buxoro viloyati hududiy boshqarmalari mutaxassislari hamda 100 nafarga yaqin yoshlar ishtirok etdilar. Shuningdek, tadbirda “Golden Degrez”, “Zarif Zulfiya”, “Saodatxon tikuv uyi” kabi muvaffaqiyatli tadbirkorlik subyektlari rahbarlari ham ishtirok etib, o‘z tajribalari bilan bo‘lishdilar.

Tadbirda Biznes va tadbirkorlik oliy maktabi Buxoro hududiy filiali rahbari R. Naimov kirish so‘zi bilan so‘zga chiqib, bugungi kunda yoshlar tadbirkorligini rivojlantirish imkoniyatlari, innovatsion yondashuvlar asosida biznesni tashkil etishning ahamiyati hamda mentor-tadbirkorlarning bu jarayondagi o‘rni muhim ekanligini ta’kidladi.

Dastur davomida “Golden Degrez” mehmonxonasi rahbari D. Salimova kichik mehmonxona biznesini yo‘lga qo‘yish va rivojlantirish tajribasi bilan o‘rtoqlashib, turistik xizmatlarda sifat, mijozlarga xizmat ko‘rsatish standartlari va marketing yondashuvlari haqida ma’lumot berdi. Shuningdek, “Zarif Zulfiya” va “Saodatxon tikuv uyi” korxonalari rahbarlari ham biznesni tashkil etish va samarali boshqarish bo‘yicha tavsiyalarini taqdim etdilar.

Tadbirning ikkinchi qismida ishtirokchilar uchun “No‘g‘ay karvon saroyi”, “3-gumbaz” hunarmandchilik markazlari hamda oilaviy mehmonxonalarga tashriflar tashkil etilib, tadbirkorlik faoliyatining amaliy jihatlari bilan yaqindan tanishish imkoniyati yaratildi.

Ushbu mahorat darsi yoshlar tadbirkorlik ekotizimi ishtirokchilari o‘rtasidagi hamkorlikni mustahkamlash, tajriba almashish va yangi biznes tashabbuslarini qo‘llab-quvvatlash uchun muhim platformaga aylandi.