Joriy yilning 8-oktabr kuni Biznes va tadbirkorlik oliy maktabida «O‘zbekistonning 2050-yilgacha bo‘lgan Milliy hududiy rivojlanish konsepsiyasi (NSVP)» mavzusida amaliy seminar bo‘lib o‘tdi. Tadbir Biznes va tadbirkorlik oliy maktabi hamda O‘zbekistondagi Jahon banki o‘rtasidagi hamkorlik doirasida tashkil etildi.

Tadbirda 25 yildan ortiq vaqt davomida boshqaruv, ijtimoiy-iqtisodiy tadqiqotlar va institutsional salohiyatni rivojlantirish sohalarida faoliyat yuritgan Jahon banki eksperti doktor Mohamed Nada ma’ruzachi sifatida ishtirok etdi. U avval UN-Habitat tashkilotining shahar siyosati, boshqaruv va qonunchilik dasturiga rahbarlik qilgan. Shuningdek, CARE International tashkilotida boshqaruv va fuqarolik ishtiroki dasturini boshqargan.

Konsepsiya O‘zbekiston Respublikasi Hukumatining ko‘magida Jahon banki tomonidan ishlab chiqilmoqda. U mamlakat hududiy rivojlanishining uzoq muddatli yo‘nalishlarini belgilaydi. Hujjat shaharlarning joylashuvi va o‘sishi, iqtisodiy faollik, infratuzilma va xizmatlarning rivojlanishi iqtisodiyotni yanada samarali, o‘zaro bog‘langan, inklyuziv va barqaror qilishga qanday xizmat qilishi mumkinligini ko‘rsatadi.

Ma’ruzada konsepsiyaning maqsadlari, uning tahliliy yondashuvi va dastlabki xulosalari taqdim etildi. Jumladan, shaharlar tizimining roli va shahar hamda qishloq hududlari o‘rtasidagi o‘zaro hamkorlik, shuningdek, hududlarning sanoat, turizm va qishloq xo‘jaligidagi salohiyati ko‘rib chiqildi. Transportdan foydalanish imkoniyati, shaharlarning o‘sishini boshqarish, yer, suv va energiyadan foydalanish, shuningdek, iqlim o‘zgarishiga chidamlilik masalalariga alohida e’tibor qaratildi. Ma’ruzachi, shuningdek, milliy hududiy rivojlanish konsepsiyasi hududiy strategiyalar va mahalliy rejalar bilan qanday bog‘lanishini tushuntirdi. Uning ta’kidlashicha, konsepsiya tavsiyalari tarmoq siyosati, kapital qo‘yilmalarni rejalashtirish hamda boshqaruvning turli darajalari o‘rtasidagi muvofiqlashtirishni kuchaytirish orqali amalga oshiriladi.

Muhokama mamlakatning hududiy siyosatini tahlil qiluvchi va o‘rganuvchi mutaxassislarni birlashtirdi. Strategik va makroiqtisodiy yondashuvni yetakchi aql markazlari - Iqtisodiy tadqiqotlar va islohotlar markazi, Strategik va mintaqalararo tadqiqotlar instituti, Makroiqtisodiy va hududiy tadqiqotlar instituti hamda Markaziy Osiyo xalqaro instituti vakillari taqdim etdilar. Mehnat bozori, kambag‘allik, mehnat unumdorligi, statistika va fiskal siyosat bo‘yicha profil ekspertizani sohaviy tadqiqot institutlari taqdim etdilar. Akademik hamjamiyatni Mirzo Ulug‘bek nomidagi O‘zbekiston Milliy universiteti va Toshkent davlat iqtisodiyot universiteti vakillari namoyish etdilar.

Muhokama davomida ishtirokchilar shakllanayotgan siyosat yo‘nalishlari va ularning O‘zbekiston rivojlanishining ustuvor yo‘nalishlari uchun ahamiyatini muhokama qildilar.